د کندز پوهنتون کرنې پوهنځي څخه راغلي پلاوي له وردګ پوهنتون څخه لیدنه وکړه.
د علمي اړیکو او ګډو څېړنیزو همکاریو د پراختیا په موخه، د کندز پوهنتون د کرنې پوهنځي د اتو څانګو آمرینو او استادانو له وردګ پوهنتون څخه علمي لیدنه ترسره کړه.
د پلاوي ښه راغلاست د وردګ پوهنتون د علمي او محصلانو چارو مرستیال، پوهاند دوکتور خیبر سیفي او د کرنې پوهنځي رئیس پوهنمل دوکتور عبدالکریم امین له لوري وشو چې ورته د وردګ پوهنتون او په ځانګړې توګه د کرنې پوهنځي د علمي، څېړنیزو او عملي فعالیتونو، تدریسي امکاناتو او راتلونکو همکاریو په اړه معلومات وړاندې شول.
وروسته نوموړي پلاوي د کرنې پوهنځي له څېړنیز فارم، ګلخانې، څېړنیزو پروژو او عملي روزنیزو اسانتیاوو څخه لیدنه وکړه او د یادو برخو له تخنیکي فعالیتونو او لاسته راوړنو، په اړه ورته بشپړ معلومات وړاندې شول.
د لیدنې په پای کې د دواړو پوهنتونونو استادانو د ګډو څېړنیزو پروژو، علمي تجربو پر تبادلې ټینګار وکړ، ترڅو د متقابلو تجربو او علمي ظرفیتونو له شریکولو سره د ملک د لوړو زده کړو په نظام کې اغېزمنه علمي همکاري نوره هم پیاوړې شي.
عامه اړیکو او نشراتو عمومي مدیریت
