وردګ د لوړو زده کړو مؤسسه د هېواد په کچه د اسلامي ارزښتونو، کلتوري ویښتابه، اقتصادي پرمختګ او نورو علمي برخو کې د لوړو زده­ کړو او علمي کادرونو د روزنې یو پوهنیز او اکاډمیک مرکز دی، چې له جوړېدو یې نږدې یوه لسیزه تېرېږي. دغه اکاډمیک مرکز د خپل جوړښت په لومړۍ لسیزه کې د لوړو زده کړو وزارت له اصولو او قوانینو سره سم د څلورو پوهنځیو په لرلو سره سلګونه زده کړیالان په ملي او اسلامي روحیه سمبال ټولنې ته د خدمت لپاره وړاندې کړې دي.

علمي او اکاډمیک بنسټونه د ټولنې په کچه د پوهې او پرمختګ آره دنده پرغاړه لري، او د بشري ټولنو د علمي او فکري لوړتیا سرچینې ګڼل کيږي. له همدې کبله وردګ د لوړو زده کړو مؤسسه؛ لوړو زده کړو ته لاسرسی یوه اسلامي وجیبه، ملي اړتیا، د سیمې او نړۍ په کچه سیال حیثیت ته د رسیدو په لاره کې یوازینۍ منطقي او بنسټیزه لاره ګڼي.

وردګ د لوړو زده­ کړو مؤسسه د همدغو اسلامي او ملي اړتیا پر بنسټ په ۱۳۹۳ کال کې د یوې ولسي غوښتنې پر بنسټ رامنځته شوه او د یوه ولسي عزم  او ملاتړ په پایله کې د ملی سوداګرو، قومی مشرانو، فرهنګیانو او استادانو په مرسته یې لومړنۍ بېخبناوې پر پښو ودرېدې او فعالیت یې پیل کړ.

یاده مؤسسه که څه هم په تېرو لسو کلونو کې د پام وړ لاسته راوړنې لري، خو لا هم د یوې نوې پیل شوې مؤسسې په توګه هڅې روانې دي، چې له نړیوالو اسلامي، اکاډمیکو او پوهنیزو آرونو سره سم په بېخبنایي او مخبنایی برخو کې د پراختیا جوګه شي او د هېواد په کچه د یو روښانه پوهنیز نظام جوړولو لپاره په کمي او کیفي توګه د کادرونو روزنه او د هغوی د علمي او مسلکي ځواک لوړتیا رامنځته کړي.

وردګ د لوړو زده­ کړو مؤسسه په ټولو کاري برخو کې د دوامدارې عصري کېدنې په موخه په پلان کې لري، چې د استادانو ځاني ارزونې او پوهنیزې لوړتیا ته زمینه مساعده کړي او د هېواد په کچه محسوسو اړتیاوو ته په کتو سره، د علمي لاسته راوړونو په رڼا کې ټولنیزو اړتیاوو ته د ځواب وینې په موخه خپل پوهنځي او دیپارتمنتونه پر علمي او عصري معیارونو سمبال کړي.

وردګ د لوړو زده­ کړو مؤسسه دا خپل رسالت بولي، چې د زده ­کړې، تحقیق او تدریس لپاره آرام، هوسا، په علمي او اکاډمیکو معیارونو برابر چاپېريال رامنځته کړي، ترڅو زده ­کړیالان په پوره ډاډ او اطمینان سره وکولای شي، په دغه مؤسسه کې خپلو زده کړو ته ادامه ورکړي.

د یو ريښتونې اسلامي ټولنې اخلاق د پوهو او زده­ کړیو وګړو له فکرونو سرچینه اخلي، له همدې کبله د هر ډول فساد په وړاندې مبارزه کول زموږ فردی او اجتماعی دنده ده، چې د یو دیني مسؤلیت په توګه به هېڅکله هم له پام ونه لويږي. د وردګ لوړو زده کړو مؤسسه هڅه کوي، خپل زده ­کړیالان پر هغو اخلاقي ځانګړنو سمبال کړي، چې ټولنه یې له موجودیت څخه خوند واخلي او خلک ورته د خپلو اوږو بار نه، بلکې د خپلې مشال لرونکې امسا په سترګه وګوري.

 

په درنښت

الحاج مولوی صفت الله حقانی

د وردګ پوهنتون رئیس