سمینار کاربرد هوش مصنوعی

د نباتي امراضو په تشخیص کې د مصنوعي ځیرکتیا د کارونې علمي کنفرانس ترسره شو

د معاصرې ټکنالوژۍ او کرنیزو علومو د همغږۍ په موخه، د وردګ پوهنتون د کرنې پوهنځي، د مسلکي پراختيا آمریت په همکارۍ، د “نباتي امراضو تشخیص په برخه کې د مصنوعي ځیرکتیا کارونې” تر سرلیک لاندې یو مهم او علمي کنفرانس ترسره شو.
دغه علمي کنفرانس چې د کرنیزو زده کړو د نوښت، عملي مهارتونو د لوړولو او د نوې ټکنالوژۍ د پېژندنې په موخه جوړ شوی و، د کرنې پوهنځي استادانو او ګڼ شمېر محصلینو ترڅنګ د میدان وردګ ولایت د کرنې، اوبو لګولو او مالدارۍ ریاست یو شمېر استازو هم پکې ګډون کړی و.
د کنفرانس په پرانیسته کې د وردګ پوهنتون سرپرست رئیس او د علمي او محصلانو چارو مرستیال، پوهنوال دوکتور خیبر سیفي، د کرنې پوهنځي رئیس، پوهنمل دوکتور عبدالکریم امین او د میدان وردګو ولایت کرنې، اوبو لګولو او مالدارۍ ریاست استازو د مصنوعي ځیرکتیا د اهمیت، اړتیا او په کرنیز سکتور کې د هغې د اغېزمنې کارونې په اړه هر اړخیز معلومات وړاندې کړل. هغوی ټینګار وکړ چې معاصر کرنیز پرمختګونه د نوې ټکنالوژۍ له کارونې پرته ناشوني دي او مصنوعي ځیرکتیا کولای شي د نباتي امراضو د تشخیص بهیر چټک، دقیق او اقتصادي کړي.
د کنفرانس علمي او عملي برخه د کمپیوټر ساینس پوهنځي استاد، پوهنمل اسدالله محمدي له لوري وړاندې شوه. نوموړي د مصنوعي ځیرکتیا پر بنسټ د نباتي امراضو د پېژندنې بېلابېل میتودونه، عملي بېلګېw او تخنیکي لارې چارې ګډونوالو ته تشریح کړې، چې د محصلینو له پراخې علاقې او علمي پوښتنو سره مل وې.
ګډونوالو د دې کنفرانس له لارې وکولای شول د کرنې او ټکنالوژۍ د ګډو حل لارو په اړه نوې علمي تجربې ترلاسه کړي او د نباتي ناروغیو د تشخیص په برخه کې د عصري وسایلو د کارونې له ګټو سره اشنا شي.
د وردګ پوهنتون مسؤلین وايي، د داسې علمي پروګرامونو ترسره کول د محصلینو د عملي مهارتونو او د هېواد د کرنیز سکتور د عصري کولو لپاره اړین ګام دی، او ټینګار کوي چې دا لړۍ به په راتلونکي کې هم دوام ولري.
عامه پوهاوي، اړیکو او نشراتو عمومي مدیریت