د وردګ پوهنتون د عمومي رئیس د دندو لایحه
د وردګ پوهنتون د تشکیلاتو په رئس کې د پوهنتون رئیس قرار لري، چې د اسلامي امارت او د لوړو زده کړو وزارت د ټولو احکامو، فرامینو، مقرراتو، هدایاتو او طرزالعملونو په روښنايۍ کې د پوهنتون مشري کوي. د پوهنتون رئیس د یو لړ تعریف شوو دندو په تر سره کولو مکلف دی، چې عبارت دي له:
۱. د پوهنتون هوکړو او اهدافو ته د رسېدو په موخه د لوړو زده کړو وزارت له سپارښتنې سره سم د رهبري او عالي شورا په غونډو کې ګډون کول.
۲. د محصلانو لپاره د تحصیلي وضعیت، درسي کتابونو او لکچرنوټونو د ښه والي په موخه د آسانتیاوو او اړینو تدابیرو رامنځته کول.
۳. د علمي، څېړنیزو، فرهنګي او تربیتي کړنلارو رامنځته کول او د محصلانو او استادانو د وړتیا لوړونې په موخه د هغو له پلي کېدو څخه څارنه او کنټرول ترسره کول.
۴. د تقنیني اسنادو او لوایحو سره سم د استادانو د ښوونلارو (میتودونو)، درسي، علمي او فرهنګي پلانونو او برنامو له تطبیق څخه څارنه او کنټرول ترسره کول.
۵. د پوهنتون په کچه د علمي شورا د غونډو مشري کول او د ترسره شوو پرېکړو له تطبیق څخه څارنه کول.
۶. د نظم او دسپلین د رامنځته کېدو او د سالمو اکاډمیکو فعالیتونو د پرمختګ په موخه د طرحو وړاندې کول.
۷. په پوهنتون کې د نویو تدریسي، څېړنیزو او ښوونیزو سیستمونو د رامنځته کېدو او پراختیا په موخه په علمي او فرهنګي برخو کې د ملي او نړیوالو مؤسساتو د پام را اړونې په موخه د اړیکو پراختیا او ساتنه.
۸. د پوهنځیو په کچه د علمی شوراګانو د پرېکړو تائید، رد او یا هم د اړتیا په صورت کې علمي شورا ته د هغو وړاندې کول.
مدیریتي دندې:
۱. ټاکل شوو موخو ته د رسېدو لپاره د وزارت له عمومي پلان سره سم د میاشتنیو، ربعوارو او کلنیو پلانونو جوړول.
۲. تر لاس لاندې کارمندانو ته د ورکشاپونو، سمینارونو او کاري بهیر له لارې د مسلکي وړتیا لېږدول.
۳. د پوهنتون د کلني کاري پلان پر بنسټ د بودجوي اړتیاوو تشخیص او اړوند ریاست ته یې وړاندېزول.
۴. د تر لاس لاندې کارمندانو مشري، مدیریت او ارزونه ترسره کول، د ښوونیزو اړتیاوو سنجول او د ظرفیتونو لوړول.
۵. د اړوندې برخې له کړنو څخه د میاشتنیو، ربعوارو او کلنیو راپورونو وړاندې کول او د اړتیا پرمهال له مهمو کړنو او لاسته راوړنو څخه د مشرتابه د خبراوي په موخه د راپورونو وړاندې کول.
۶. د نورو هغو دندو ترسره کول، چې د اړوندو چارواکو له لوري د وزارت له پالیسۍ سره سمې سپارل کيږي.
د همغږۍ دندې:
۱. د چارو او دندو په اړه د همغږۍ رامنځته کول او په یوه واحده لاره د چارو د تعقیب په موخه له نورو رئیسانو سره د اړیکو ټینګول.
۲. د پرېکړو لپاره پر وخت سره د اطلاعاتو ترلاسه کولو او همغږۍ رامنځته کولو په موخه له نورو بهرنیو ذیدخله واحدونو سره د اړیکو ساتل.
د پوهنتون رئیس دوه مرستیالان لري، چې یو یې د علمي او محصلانو چارو مرستیال دی او بل یې د مالي او اداري چارو مرستیال. مرستیالان د پوهنتون له رئیس سره په څنګ کې د اړوندو برخو د مرستیالۍ چارې پرمخ وړي.
د لوړو زده کړو وزارت د ۱۴۰۳ کال له منظور شوي تشکیلاتي طرحې سره سم د وردګ پوهنتون د ریاست په تشکیل کې د دفتر عمومي مدیریت، د اسنادو، اړیکو او آرشیف مدیریت، د دعوت او ارشاد آمریت، د احصائیې او پلان عمومي مدیریت، د علمي او محصلانو چارو معاونیت او د مالي او اداري چارو معاونیت شتون لري، چې هر یو به په ځانګړي توګه معرفي شي.