علمي کادر غړو ته د برېښنايي ټولګي Google Classroom د کارونې ورکشاپ وړاندې شو
د وردګ پوهنتون برېښنايي زده کړو کمېټې د استادانو د مسلکي پراختیا آمریت په همکارۍ، د علمي کادر غړو د مسلکي وړتیاوو د لوړونې او د برېښنايي زدهکړو د پیاوړتیا په موخه، د برېښنايي ټولګي(Google Classroom) د کارونې عملي ورکشاپ ترسره شو.
ورکشاپ د قرآن کریم د څو مبارکو آیتونو په تلاوت سره پیل شو. ورپسې د وردګ پوهنتون د علمي او محصلانو چارو مرستیال، پوهاند دوکتور خیبر سیفي، د برېښنايي زدهکړو، د تدریس په بهیر کې د ټکنالوژۍ د اغېزمنې کارونې او د استادانو د مسلکي ظرفیت لوړونې پر اهمیت خبرې وکړې.
له هغه وروسته د کمپیوټر ساینس پوهنځي استاد، پوهنمل اسدالله محمدي، د ورکشاپ عملي برخه وړاندې کړه. نوموړي ګډونوالو ته د ګوګل کلاس روم د کارونې، برېښنايي ټولګیو د جوړولو، د درسي موادو شریکولو، د کورنیو دندو او ازموینو تنظیم، ارزونې او د تدریسي چارو د برېښنايي مدیریت اړوند عملي لارښوونې وړاندې کړې.
په وروستیو کې دغه ورکشاپ په دعائیه کلام سره پای ته ورسېد.
د عامه اړیکو او نشراتو عمومي مدیریت
