د وردګ پوهنتون کرنې پوهنځي او د میدان وردګ ولایت د کرنې، اوبو لګولو او مالدارۍ ریاست ترمنځ د علمي همکاریو هوکړهلیک لاسلیک شو.
دغه هوکړهلیک د وردګ پوهنتون د کرنې پوهنځي رئیس پوهنمل دوکتور عبد الکریم امین له لوري د میدان وردګ ولایت د کرنې، اوبو لګولو او مالدارۍ ریاست له رئیس مولوي محمد رحیم نعماني سره د نوموړي ریاست په دفتر کې د پنځو کلونو لپاره لاسلیک شو.
د هوکړهلیک له مخې به دواړه بنسټونه د علمي تجربو او معلوماتو په شریکولو، لنډمهاله روزنیزو پروګرامونو، ګډو علمي څېړنو او په کرنیزه برخه کې د شته ستونزو د علمي حللارو په موندلو کې ګډ کار کوي.
همدارنګه، دواړه لوري به د اړوندو پالیسیو په پام کې نیولو سره په بېلابېلو کرنیزو برخو کې ګډ علمي او څېړنیز فعالیتونه ترسره کوي څو د دواړو برخو علمي ظرفیتونه د کرنې له عملي اړتیاوو سره همغږي او د کرنیزو ستونزو لپاره اغېزمنې او عملي حللارې وموندل شي.
عامه اړیکو او نشراتو عمومي مدیریت
