وردګ پوهنتون کې د ۱۴۰۵.ل کال عمومي کانکور ازموینه په بریالیتوب سره پای ته ورسېده.
نن، شنبه، د ۱۴۴۷.ق کال د ذوالقعدې میاشتې ۲۹مه نېټه، وردګ پوهنتون کې د ۱۴۰۵.ل کال عمومي کانکور ازموینه په بریالۍ توګه پای ته ورسېده.
د ازموینې دغه درې ورځنی بهیر، چې د میدان وردګو ولایت د زرګونو تنو ځوانانو تحصیلي سرنوشت ورپورې تړلی و، د امن، نظم او بشپړ شفافیت په فضا کې تر سره شو.
د ازموینې پروسه د ازموینو عمومي ادارې پلاوي او پوهنتون د مشرتابه تر مستقيم نظارت لاندې، د علمي کادر غړو، اداري کارکوونکو، انظباط محصلینو او امنیتي ارګانونو په پیاوړې همکارۍ پر مخ ولاړه.
وردګ پوهنتون مشرتابه له ټولو هغو ادارو او افرادو څخه چې د دغه علمي بهیر د شفافیت او په سمه او سالمه توګه د ترسره کیدو په برخه کې یې نه ستړې کېدونکې همکارۍ وکړې، د زړه له کومې مننه او قدردانی کوي.
د پوهنتون مشرتابه د شفافیت، امانتدارۍ او علمي اصولو په رڼا کې د کانکور ازموینې له ترسره کېدو خوښي څرګندوي او ژمنه کوي چې د هېواد د ځوان نسل لپاره به همداسې باوري، منظمه او مسلکي فضا رامنځته کوي.
عامه پوهاوی، اړیکو او نشراتو عمومي مدیریت
